PSALM 1
JESUS SËEN ONS.
“Dit gaan goed met die
mens….” Psalm 1:1
God het ons in die Naam van Jesus
Christus gesëen. “Daarom het God sy Dienaar na die wêreld toe laat kom en Hom
heel eerste na julle toe gestuur om vir julle tot ‘n sëen te wees … “
(Handelinge 3:26). Sonder Sy Seun sou dit beslis nie met ons goed gegaan het
nie. Ten spyte van hierdie goddelike goedgesindheid , twyfel ons steeds of Hy
sy guns oor ons gebied het: ons voel eerder vervloek. Alles loop skeef in ons
lewens: ons het ouers, kinders, huweliks en werksprobleme. Wie of wat is die
oorsaak dat alle rampe ons tref?
Beslis nie God nie.
God gee opnuut aan ons die volgende
heerlike versekerings: “Ons (het) met mekaar deel aan dieselfde gemeenskap en
reinig die bloed van Jesus, sy Seun, ons van elke sonde.” ( 1 Johannes 1:7):
Christus reinig ons van elke sonde wat ons onder die son gepleeg het. As ons
ons sondes bely, is ons vir eens en vir altyd vergewe. Desnieteenstaande het Jesus veel meer vir ons
gedoen. Hy is vervloek weens ons sondes. “Christus het ons losgekoop van die
vloek wat die wet meebring, deur in ons plek ‘n vervloekte te word. Daar staan
naamlik geskrywe: “Vervloek is elkeen wat aan ‘n hout opgehang is.” (Galasiërs
3: 13). Die vloek wat op ons gerus het, het Hy uitgewis aan die Kruis. In
Christus is ons nie meer vervloektes nie, maar God se gesëendes.
GEBED
Here Jesus, dit is moeilik om te
aanvaar dat U ons gesëen het. Ons moet bely dat ons probleme u sëen in ons
gemoed vernietig het. Gee oorwinningskrag, Here Jesus, dat ons saam met Psalm 1
kan bely dat dit met ons goed sal gaan.
VRAE
1. Gelowiges moet seker gevare volgens
Psalm een vermy. Wat is dit?
2. Hoe kan ons geestelike vrugte dra
soos die boom van Psalm een?
No comments:
Post a Comment