PSALM 16
GODDELIKE BEGRIP.
1. Neem my angs in ag, Jesus, Christus
want ek is so weerloos teen vrees,
daarom my gebed dat U begrip sal hê
vir my innerlike nood.
2. Ek het vir Jesus gesê:
Ek het U aangeneem as my persoonlike
Verlosser,
daar is geen rede om beangs te wees
nie,
nogtans het lewensvrees my oorweldig.
3. Die alternatiewe wat in die land,
in U plek aangebied word, Here Jesus,
so aanloklik vir die massa’s,
met diesulkes en hulle planne kan ek
my nie vereenselwig nie.
4. Mag ek nooit van die regte roete
afwyk nie, Here Jesus,
want ek wil net aan U lojaal bly.
Bewaar my van enige bedenklike raad
van watter aard ookal,
sodat my integriteit bo verdenking sal
bly.
5. Here Jesus, U is die enigste één
wat innerlike vrede en kalmte
kan verskaf.
6. ‘n Pragtige landskap skenk U aan
my,
ja, wat U gee is volmaak,
alles om my heen is helder en mooi.
7. Ek kan en mag nie swyg nie,
want U lei my tot die regte insig in
myself,
selfs as ek in die nag daaroor nadink,
bly ek bewus van U teenwoordigheid.
8. Ek weet die Here Jesus is altyd by
my,
omdat U teenwoordig is,
sal my vrees wyk.
9. Daarom is ek uitermate vol blydskap
en voel ek my selfopgelegde vrees
verdwyn.
10. U, Here Jesus, het uit die graf
opgestaan,
daarom sal ek ook uit die dood
ontwaak.
11. U het my uit guns alleen gered
By U is daar uitbundige vreugde.
U insigewende inwerking in my
kan my van angs bevry.
No comments:
Post a Comment