‘n Gesprek tussen ‘n gelowige wat die lewe nie meer verstaan nie en sy
God
Was jy al op ‘n plek in jou lewe waar jy eintlik niks
meer verstaan nie?
Verder: was jy al op die plek van noodkrete?
Dawid was daar gewees, toe skryf hy Psalm 17. Psalm 17
sou perfek in Izak de Villiers se digbundel, VERVREEMDELING, ingepas het.
Kom ons lees dit, met so hier en daar ‘n stukkie
toeligting tussen hakies. Kyk en luister
spesifiek vir een woord in die psalm: die woord “oogappel.” Merk dit, hou dit
in gedagte, want ná die lees van Dawid se beskrywing van ‘n vervreemdeling (‘n
onbegrypende gelowige), gaan ons weer by die woord ”oogappel” uitkom.
Psalm 17
'n Gebed van Dawid.
Luister tog, Here (Jahwe, EK IS, die Ewige, God van Israel en die verbond), na
my regverdige saak, let op my hulpgeroep.
Hoor tog die gebed
wat ek in alle opregtheid bid. U
sal (as Regter) uitspraak lewer in my
guns: u oë sien immers self wat reg is.
As U my sou toets, my
selfs in my slaap sou ondersoek, my deeglik sou keur, sou U (as Regter) niks
verkeerds (geen waarheid in my teëstanders se aantygings) vind nie. Oor die
doen en late van mense het ek niks verkeerds gesê nie (het ek my van kwaadpraat
weerhou): ek het my aan u bevel gehou. Elke stap van my was vas op die koers
wat U aangewys het. My voete het nie daarvan afgewyk nie. (Ek het nie die
praktyke beoefen, voorbeeld gevolg van mense wat verwoes en vernietig nie.)
Ek roep U aan, want U
sal my antwoord, my God! Luister tog (Buig af) na my en hoor wat ek sê. Toon u wonderlike trou, U wat almal help wat
vir hulle vyande by U skuil.
Ps 17:8-9, ANV. Beskerm my soos die appel van u oog, steek my
weg in die skaduwee van u vleuels vir die goddeloses wat my wil oorweldig, die
doodsvyande wat my omsingel.
Ps 17:8-9, NLV (CUM),
Beskerm my soos die appel van u oog (u kosbaarste besitting). [Deut 32:10;
Sag 2:8] Bedek my (beskermend, koesterend) in die skadu van u vlerke, [Ps 91:4;
Matt 23:37] van bose mense wat my aanval, van wrede vyande wat my omring.
Ps 17:10-15
Sonder enige meegevoel, met monde wat
aanmatigende dinge sê, omsingel hulle my
waar ek ook gaan. Hulle soek my ondergang. Hulle is soos leeus,
oorgehaal om te verskeur, soos jong leeus wat iets voorlê.
(OPMERKING: Nou
vra die Psalmskrywer die Here om reg en geregtigheid te laat geskied: op Ou-Testamentiese, voor-Christelike wyse,
want vir Jesus Christus het hy nog nie geken nie. Hier volg dus nou ‘n Ou-Testamentiese
vergeldingsbede. Die wet of beginsel van regverdige, verdiende vergelding (Lex talionis), waarvolgens die dader— die skuldige en ook die regverdige
—straf of beloning in direkte verhouding tot sy dade ontvang, [Eks 21:24-25;
Deut 19:21; Spr 12:13-14] word herhaaldelik in die Psalms gevind, o.a. in
Ps 7:4-6, 16-17; 9:16; 35:8; 37:14-15; 57:7; 59:13; 69:23; 141:10)
Kom tog, Here, staan
hulle voor, dwing hulle op die knieë. Red my met u swaard uit die mag van die
goddeloses, met u eie hand, Here, van
hierdie mense. Laat hulle ontydig omkom, sny hulle lewens af; laat hulle hulle
vol eet aan die onheil wat U vir hulle gereed hou; laat daar oorgenoeg wees vir
hulle kinders en laat daar nog oorbly vir die kindskinders.
(OPMERKING: In
Matt 5:38-42 verklaar Jesus Christus Lex
talionis as uitgedien en gee Hy ‘n nuwe beginsel, gedragskode en opdrag aan
sy volgelinge. Ons ou-Testamenentiese
psalmskrywer beroep hom egter in die lig wat hy gehad het, op die
regverdigheid van die Here. Hy glo dat
die Here hom, die Psalmskrywer, gunstig gesind sal wees, want as wetsgehoorsame
Israeliet het hy God in opregtheid en gehoorsaamheid gedien.)
Maar wat my betref, omdat die reg aan my kant
is, sal ek weer voor U staan. As ek wakker word (uit die dood), sal ek my
verbly in u teenwoordigheid.
(OPMERKING: Die
feit dat sommige Ou-Testamentiese gelowiges op lewe ná die dood gehoop het,
blyk uit o.a. Ps 16:9-11; 17:15; 49:15-16; 73:23-24 en Dan 12:2. In Hand 2:25-28 pas Petrus die
woorde van Ps 16:9-11 toe op die opstanding van Jesus Christus. Petrus grond sy Skrifuitleg op Jesus Christus
se woorde dat alles wat in die wet van Moses, die profesieë en die psalms oor Hom geskryf is, vervul
moes word.) [Luk 24:44]
HOE LYK ‘N OOGAPPEL?
In Ps 17:8-9 bid Dawid dat die Here iets baie spesifieks
vir hom moet doen:
Ps 17:8-9, ANV. Beskerm my soos die appel van u oog, steek my
weg in die skaduwee van u vleuels vir die goddeloses wat my wil oorweldig, die
doodsvyande wat my omsingel.
Ps 17:8-9, NLV (CUM),
Beskerm my soos die appel van u oog (u kosbaarste besitting). [Deut 32:10;
Sag 2:8] Bedek my (beskermend, koesterend) in die skadu van u vlerke, [Ps 91:4;
Matt 23:37] van bose mense wat my aanval, van wrede vyande wat my omring.
Wat sou jy doen as ek jou so vra om jou oogappel te
beskerm?
Jy sou ‘n oogskut opsit, ‘n beskermende bril dra, soos
iemand wat bosse met ‘n meganiese bossiesnywer snoei of uitsny. Soos iemand wat sweis of ‘n brand gaan help
blus.
In Hebreeus verwys die term “oogappel” nie hierna nie.
In Hebreeus word
“oogappel” vertaal met: “Die figuurtjie, klein mannetjie van die oog.” Dit
verwys na ‘n weerkaatsing in die oë van die een met wie jy in gesprek is.
Die mens sien sy
eie beeld in die oë van iemand wat net op hom fokus.
Dawid vra: Here, maak my, die een wat nou glad niks
verstaan nie, die klein figuurtjie in u oë.
Kyk vir my, maak mý, die klein figuurtjie (mannetjie) in
die gevoeligste deel van u oë, nou die middelpunt van u aandag en u sorg. Sien my volledig raak, en help/beskerm/sorg
vir my.
Wanneer laas het
jy iets so moois, iets van soveel belang gehoor?
Oogappel-wees
gaan oor ware, egte, intens betrokke verhoudings. Dit gaan oor interaksie, vertroue, jou plek
in iemand anders se lewe, werklikheid en hart.
Jy weet mos dat
ouers van outistiese kinders iewers agterkom dat hulle kindjie nie oogkontak
maak nie. Hulle is nie die klein
figuurtjies in hulle kind se pupille nie.
Hulle weet iets is verkeerd:
mense moet klein figuurtjies in ander mense se pupille wees.
Jy weet mos dat
een van die duidelikste tekens van
versteurde verhoudings in die huwelik, werksplek, tussen ouer en kind, in die
gemeente, in die kerkraad, in onderhoude of waar ook al, die afwesigheid of
progressief tanende oogkontak is. As jy
en jou huweliksmaat mekaar met die vermyding van oogkontak straf en
mishandel, as jy en ‘n kollega oogkontak
vermy en wedersyds nie die klein figuurtjie in mekaar se oë wil wees nie, is
daar iets groots verkeerds. Daar is nie
meer ‘n opregte vertrouensverhouding nie.
Wat ‘n eenvoudige
waarheid:
Wanneer jou
huweliksmaat iets met jou wil deel, wil hy/sy die klein figuurtjie in jou oë
wees, jou oogappel. Hy/sy wil kosbaar, waardevol voel. Jy gee waarde aan iemand anders deur van
hom/haar jou oogappel, die klein figuurtjie in jou oë, te maak.
Wanneer jou kind
by jou kom sit en met jou begin gesels, wil hy/sy die klein figuurtjie in jou
oë wees, jou oogappel. Jy onderskryf jou toewyding as ouer aan hom, jou omgee
en respek vir jou kind, deur hom jou oogappel, die klein figuurtjie in jou
pupille, te maak.
Nou vra Dawid:
Here, ek is die klein figuurtjie in u oë.
U is so groot, so geweldig, so magtig en sterk en genadig. Ek weet ek pas in u goedheid, teerheid,
liefde, diepste erbarming, ontferming in.
Daarvan verseker U my oor en oor in u Woord.
Beskerm my soos
die appel van u oog (u kosbaarste besitting). [Deut 32:10; Sag 2:8]
Bedoelende:
·
Fokus in hierdie
noodsituasie direk op my, Here.
·
Moet u oë nooit van my
af wegdraai nie.
·
Sorg vir my, help my.
·
Vou my toe in u liefde,
soos ‘n hen haar kuikens onder haar vlerke.
Sal God dit vir
jou en my doen as jy en ek dit so vir Hom vra?
Ongetwyfeld. Hy sê dit in sy Woord vir elkeen wat tot Hom
roep.
Mat 7:7-11
Vra, en vir julle sal gegee word; soek, en
julle sal kry; klop, en vir julle sal oopgemaak word,
want elkeen wat vra,
ontvang; en elkeen wat soek, kry; en vir elkeen wat klop, sal oopgemaak word.
Watter mens onder
julle sal vir sy seun 'n klip gee as hy brood vra, of 'n slang as hy vis vra?
As julle wat sleg is,
dan weet om vir julle kinders goeie dinge te gee, hoeveel te meer sal julle
Vader wat in die hemel is, goeie gawes gee aan dié wat dit van Hom vra?
Vra, klein figuurtjie in God se oë.
Hy kyk vir jou, Hy sien jou raak asof jy die enigste mens
op aarde is vir wie Hy kyk.
Hy sal jou help.
No comments:
Post a Comment