Ons sit Saterdagmiddag, 12 de
November 2016, in die Aldam, se saal, naby Ventersburg, in die Vrystaat. Net 3 van ons kyk die Rugbytoets tussen die
Springbokke en Engeland. Die Volkslied van SA word gesing. Nou net 4 reëls in
Afrikaans. Hoe anders was dit nie bykans 50 jaar gelede nie. In dieselfde saal
het ons in 1968 ‘n Nasionale Jeugbond Kongres van die OVS gehou. Toe het ons in
ons breisende Jeug entoesiasme gelewe. Ons het die helfte van die saal gevul.
Ons was Afrikaner plesierig! Ons het hoog emosioneel gesing en gepraat. Afrikaans
was al taal, die NP al Politieke Party, Volkskas al Bank, ens. Ons het landsake
gedebateer. Mosies en Beskrywingspunte was aan die orde. Vergaderingsprosedure
is gevolg. Ons het gevoel asof ons SA regeer. Daar was debatte net in Afrikaans,
maar ook redenaarskompetisies, vreemd genoeg in Afrikaans en Engels. Twee Beskrywingspunte wat ek kan onthou was: ‘n
Versoek aan die Regering vir die instelling van ‘n Ministerie van Jeugsake deur
Gert Kruger van Reitz, en my idee van die ontsouting van die seewater as
antwoord op ons watervraagstuk. Nouja die destydse NP Regering het via die
burokrasie geantwoord dat die 2 projekte te duur is om te implementeer.
Natuurlik was daar
persoonlikheidbotsings en individuele politieke aspirasies binne die
vergadering. Die vekiesing van die leier, onder-leier en Hoofbestuur was die
kanaal waarlangs al die persoonlike motiewe gekanaliseer is.
Na 50 jaar is Afrikaner-nasionalisme
‘n historiese feit. Die entoesiasme vir die Bokke in 2016 is anders as onder
die vorige bedeling. Destyds sou ons die Engelse, die veroweraars, op die Rugbyveld
wys dat ons onoorwinlik is. Nou is dit irrelevant. Dr. Frank Chicane was reg
toe hy gesê het dat die stryd tussen die Afrikaners en die Engelse uitgespeel het in
die 1976 se Soweto-opstand. Toe is Afrikaans gebruik om vir die Engelse te toon
dat ons taal gelykwaardig en ten
volle ‘n taal gelykstaande aan hulle taal is.
Nou sit ons in die donkersaal op
Aldam, want die son van Afrikaner-nasionalisme het ondergegaan. Sal dit ooit
weer opkom?
No comments:
Post a Comment